القديم

ننساه خيرلي ونرتاح:قديم وين ماليهم رضخ
ايمتا يا القديم اترد:اللي متشمت مالا حد
دموعك عليه اكبار :غلا قديم يا عين ديبلك
قديم هو اللي يا عين:متماضي غلاه وضرني
لتنين واعرات عليك:نسوة قديم يا عين والبكاء
انريد القديم ايعلم:دورت جديد وايضوق الوجع
ايجيب ما ايجيب القسم:واخد اقدم مايجيب كيفهم
بكاني جديد اليوم :ينشد عليش خانوني القدم
نمشيلك انجي بريان :دواي فيك يا دار القدم
حتى لو بجديد امطرت:مازالن ابروق القديم ايخايلن
ملدوع من قديم انخاف :نقرب جديد منا نلتدع
مليان غير داير عزم:ارياف عالمواهيم والقدم
نضايق ان كان كميت:تسكيبي ضروري عالقدم
يا القديم عليش اتعارك:درت جديد تعال وبارك
يا القديم عليش اترقع:درنا صوب جديد امصقع
رمينا يا القديم عليك:اتقى دونك مد ايديك
يحلف كان قديم براسي:سبحان اللي توه ناسي
عندك يا القديم معزه:عقلي جاه جديد ولزه
عدي يا القديم وطز:جديد امعيشني في عز
يا القديم باي باي:جديد عليا ماشي جاي
جرب يا القديم اللوعه:درت جديد انريدك توعه
يا القديم نويت فراقي:لكن يا داير يا لاقي
يا القديم اتحوس فيهن:لين بلا عزم امخليهن
يا القديم علينا سلم:عد الموت وقبر امضلم
كتر خير قديم ازاحا:لين جديد خدي مطراحه
شفت قديم بعد فرقاه :ضحكت وقلت الله الله
حتى كان اقدم فضيولي:ماني كيف زمان بطولي
رد قديم ايريد ايصالح :ما يحساب كلاه المالح
يا القديم غير خطاني:وفلي فات امسامح راني
امخزن في القلب مواهيم:الرقم السري عند قديم
يا القديم خلاص خطاني:تاخد سو اللي داواني
ابريت يا قديم بلاك:امسك دواك ماني امدوره
عالقديم النيه طارت:تستغربها لكن صارت
نار قديم كلتلي جوفي:تسلل ملبين اكتوفي
عالقديم بكا من جده:عقلي لين افراشه ندا
يا القديم نويت النسوه:ان شاءالله غير جديدك نسوه
في النيران اقدم خلوني:واللي فزعو ما حقوني
نحسابك يا عين اقدرتي:هف قديم نسف ما درتي
قديم ربط روحه بالغير:وقال ارجاني فيك الخير
بعد ماجيتك يا القديم:القيتك هالب لمواهيم
يا القديم جديد علمها:لايمها كيف اتلايمها
عالقدم اندير هتيكه:ديرت بن لادن لامريكا
عيت قديم اليوم معاهم:فضت برضانا ورضاهم
لاهوني اقدم في جرح:ايلهيهم الله في ارواحهم
يا القدم شماته فيكم:وين اندير اجدد انجيكم
يا القديم خطاني تايب:ام عويل وراسي شايب
يا القديم خطاك احملته:غير عليك الله وكلته
نا وقديم الحوش بنينا:لكن مافيه التمينا
يا القديم جروحي طابن:صوب جديد عيوني جابن
شدني قديم وقالي كيفنك:تحشمت ماقتله جروحي منك
يا القديم القينا غيرك:كان تفارق كتر خيرك
اقدم الهم قايلها قول:انسوني قالو ايش تقول
اما قديم عاشم فيك:والا دنوب يا عين دايره
صوب قديم انشدني عنا:كل سبايب دمعي منا
فضت بين قديم وبيني:لكن مازال امبكيني
وين علي القدم اتحني:جارك ما يرقد متهني
جوك اجدد يا دار وشالو:لقيو فيك اقدم مازالو
قديم تكبر ما يحساب:عقاب الدنيا غير تراب
الليل علينا ياما لم:مواجع وامهايات اقدم
يا القديم انريدك طيب:درت جديد احداي اقريب
يا القديم بقلة خيرك:لاهنت ولادرنا غيرك
يا القديم نضرهن دوبك:مادارن صوب علي صوبك
يا القديم وما تعلمها:نارك صوب جديد ردمها
يا القديم الله لايردك:ماني ملك لبوك وجدك
اوعينا يا القديم عليك:ايش ايهونك وايش اينسيك
يا القديم ياما قلنا:لكن في الاقسام اوحلنا
هداهدودك ليش غفيتي:ناس اقدم في نومك ريتي
واخيرا::::::
ماشي شور جديد رحيلي:وانت يا القديم ادعيلي

غناوة العلم

غناوة العلم هدا اللون من الوان الترات الشعبي الدي لا يزيد عن كلمات معدوده يعتبرها اهل الباديه في المرتبه التانيه بعد الشعر الشعبي او"قول لجواد" ان صح التعبير

فغناوة العلم عادة هي مفتاح جلسات الافراح يبدأ المغني بغناوه يتم على اترها فتح "فواهق" كتيره فكل يبكي عاى ليلاه.
فبعضهم تستهويه غناوة الدار والاخر المرهون وغيره اليأس وغيره القديم ........وهكدا.
على هدا الاساس تحل عقدة الجالسين ويعبر كل واحد عما بداخله على ان يكون محور الغناوه عن بند واحد كالمرهون متلا فيستمرون على المرهون حتى ينهي احدهم الصراع بما يسمى "بالقفله" بعد دلك ينتقلون الى غيره وهكدا.
غناوة العلم:هده الكلمات البسيطة التركيب وسهلة الحفظ والنطق لها مدلولاتها وتعابيرها التي تهون على ملقيها اشياء كتيره مغلقه في صدره.وتلقى في اماكن عده خلف الابل او في الاعراس.وهدا اهم مكان لها وامام حشد كبير من الحضور وتلقى بشكلها الدي يعرفه الجميع وقد يصاحبها المزمار الشعبي "المقرونه" وقد يجدت تحاور بين اتنين في ان واحد وهي التي نسميها "بالمشايله"
زهدا النوع من المأتورات الشعبيه تبتت وجودها الى اكتر من مائتي عام وهو نص وجد منحوتا على جزء من جدع شجره في وديان الجبل الأخضر ويقول:
نقض علي لنظار:غلا عزيز بوجاعن شطط
غناوة العلم في الاعراس يجب ان تتبعها شتاوة او ما يسمى"بنتها" على ان تكون في صلب معنى الغناوه ولا تخرج من دلك.فمتلا:
غناوة العلم تقول:
الدار بالبكاء رضيت:طرحيها وفيها وقبلها
وتقول الشتاوة:
فيها والله قبل انجيها:نبكي في الدار وطرحيها
ايضا غناوة العلم غير مقتصره على الغزل بكل الوانه بل تشمل الحكمه والاخلاص والوطنيه،وكدلك لها باب واسع النطاق فيما تخص الجلامه
غناوي العلم تحمل مصطلحات عده او معاني مختلفه
ونتناول منها فيما يأتي جزئيه في تعريف لها:
المرهون: هو كل من كان متزوجا ورهن للغير وقد عدب المحبين والعشاق من عدم الوصول اليه،او بالأحرى استحالة الوصول اليه
لارتهانه عند الغير
تقول الغناوة
مرهون كي سريبي جبت:منقوص عرف قالو امايتي
ونتناول مجموعة غناوي وشتاوي عالمرهون
فاهق المرهون
العين علي فاهق مرهون:تزازي ما قابلها عون
عندي جيش امدرب روسي :ينزل عالمرهون خصوصي
يامرهون اخنق واشونك:حكم اعدام انشيله دونك
من المرهون نجاه موباين:نبرا يوم ويوم انعاين
من المرهون ضليمه جتني:حتى وني راقد بكتني
من المرهون احقوقي ضاعن:في اول سوق ودين انباعن
كبدي يا مرهون كلتها:تلمسها تاخد حشمتها
فرقا مرهون امخليكن:لا عزم ولا راده فيكن
حالي من المرهون وجره:قزون امربيتا ضره
مرهونين العين عموها :تمشي بالقايد خلوها
جني يا مرهون علايل :عقلي قبلك ياما داير
من المرهون لفتلي غصه:كيف اللي مات وما وصى
طايح في مرهون اسطاوي:يجرح يوم وعشره ايداوي
يا مرهون امدردر جوي:يوم معاي ويوم عدوي
صوقرهن مرهون وعدا عقلي وافكاري في يدا
دايرلك مرهون رصيده:لين اتموتي وانتي فيده
يا مرهون ابرم ساولنا:يا تبرينا يا تقتلنا
خلاك المرهون ضريره:لا جاك ولا درتي غيره
يلي عالمرهون رميتي:راك على النار اداعيتي
عالمرهون لها تغريده:لين ادراه الكبد اتحيده
عالمرهون نويت انازع:جيت بطياراتي فازع
اللي وجعتني هانا دون:افضي مرهون وني مرهون
يا مرهون خطانا كنك:ما فرزنا كلمه منك
يا مرهون جميلك تمه:توبك ليش اتقصر كمه
يا مرهون انك شاغلني:غير انك تقسم ما ضني
يا مرهون اخبارك جني:متكدر مانك متهني
حي علي كلت ماعندي:نارك يا مرهون افندي
خلاني المرهون الجافي :نوطا في النار وانا حافي
رضينا يا مرهون عليك:رضا ما نلته من والديك
يا مرهون خدوني منك:ساكت ما تتكلم كنك
نار المرهون المدسوسه:تسطر كيف سطير السوسه
دعيت عليهم مرهونين:ونكره فب اللي يقول امين

نشفعله .. !!

يحـسـابــنـي نـركـع بعد لا قــيته ،،، خيبت ضنه وماسلام رميته ،،،،

يحسابني  نركع بعد لا قيته ... 

 يحسابنــي نــركعله ،،،، ويحسابني مالسهل نا نرجعله ،،،،

ويحساب عيني مرايفة تدمعله ...

 ويحساب عالي القدر نا وطيته ،،،، حتي أن ركع وايردني نشفعله ،،،،

مايـهمني مطـراه لا قـسـمـيـته .